Forsvarets mediebank er lansert
Forsvaret har no opna Forsvarets mediebank. Her finn du foto og video av aktiviteten vår her heime og ute, tekne av fotografane våre. Mediebanken er open for alle.
Forsvaret har inngått samarbeid med og teken i bruk NTBs kommersielle mediebank-løysing. Forsvarets mediebank er no i drift og inneheld i første omgang bilete og video frå den pågåande vinterøvinga Joint Viking 2023.
Den førre løysinga, Forsvarets mediearkiv, gjekk av tekniske årsaker ut av drift i mars 2022. Sidan har Forsvaret kommunikasjon jobba med å få på plass ei ny, driftssikker og varig løysing for medieinnhaldet sitt. Fram mot sommaren vil vi gradvis overføre eldre bilete og video til mediebanken.
Openheit og transparens er viktig for Forsvaret, og vi ønskjer å vise fram det vi gjer og driv med i daglege operasjonar og drift.
– Vi er glade for igjen å kunne tilby media og andre ei god løysing for å nytte medieinnhaldet vårt. Forsvaret har still- og videofotografar over heile landet som dagleg dekkjer verksemda vår både i Noreg og utlandet, og vi ønskjer å vise fram desse bileta til publikum, seier mediebank-ansvarleg Sissel Amundsen i Forsvaret kommunikasjon (FKOM).
Dei neste vekene startar vi arbeidet med å overføre eldre bilete og film frå det førre mediearkivet, og over til den nye mediebanken.
Mediebanken er open for alle – anten du er journalist, forskar eller anna. Merk at bileta er Forsvarets eigedom, og at du skal kreditere Forsvaret når du nyttar innhaldet (Foto: fotografnamn/ Forsvaret). Innhaldet skal heller ikkje nyttast i kommersiell eller politisk samanheng.
For meir informasjon om mediebanken:
Sissel Amundsen
Mediebank-ansvarleg
- Telefon: +47 95 74 15 12
- E-post: siamundsen@mil.no